غيرة الحريم و نانسي عجرم .. للكبار فقط

لو أنت سئ الحظ , و أمك دعت عليك في ليلة قدر , تطل عليك نانسي عجرم من شاشة التليفزيون و أنت في جلسة فيها حريم , أول حاجة , الرجالة يغمزوا لبعض , لكن فيه نوعية من الرجال تخاف أن تبتسم أو حتي تعلق , مش عشان هو مؤدب و لا حاجة , لا عشان ماينضربش بابو وردة لما يروح البيت ... لكن ستسمع الحوار الحريمي التالي :
* واحدة و عينيها بتطق شرار و بتزغر و حواجبها قفزت خارج جبهتها : أيه ده ؟ أيه قلة الأدب دي , ... ( علي فكرة نانسي معملتش و لا حاجة خالص و لا طلعت صوت اسكندراني و لا اي حركة بشفايفها أو بصوابعها )
* التانية : هو انتي يعني ماتعرفيش ما كله بينفخ دلوقت و هو فيه كدة
* التالتة : سيليكون ... كله سيليكون بس فيه رجالة عينيها زايغة بقي مع ضحكة عالية تدل علي تلقيح الكلام
* الأولانية : دي بيقولوا عملت عمليات كتيرة جدا , دول بيريلوا يا ماما ... بيريلوا يا حبيبتي ( مع غمزة بالعين , قال يعني هي اللي عارفة رجل الكيكي )
* التانية : 18 عملية تجميل
* التالتة : 18 أيه ؟؟؟ أنا سمعت انها عملت 38 عملية ... ( علي أساس ان نانسي عجرم في حجم قارة أستراليا )
* الأولانية : ايوة , أنا فاهمة أن النوع ده بيعجب الرجالة قوي , بيلاقوا اللي يصرفوا ... طيب يدونا احنا كمان فلوس و احنا نوريهم .... ( بتقول الكلام ده و هي بتبص في وش جوزها اللي عامل نفسه من بنها و هو أساسا نسوانجي و بتاع ستات )

 طبعا محدش من القاعدين سمع أي كلمة قالتها نانسي عجرم سواء كانت بتغني أو بتتكلم و لكن شوفوا معايا بناتها الأمورات ... ربنا يحميهم ... دول كمان عملوا عمليات ؟ طيب أومال جابوا الجمال ده منين ؟؟؟؟ سيليكون برضو ؟؟؟؟ ... و حسبنا الله

اشرف يسى